Deputat AFFA-ya üsyan etdi: Futboldan uzaq bir qrup adamın…

Mar 26, 2025 - 09:18
Deputat AFFA-ya üsyan etdi: Futboldan uzaq bir qrup adamın…

“Futbol üzrə Azərbaycan yığma komandası öz meydançasında Belarusa 2-0 məğlub oldu. Gerçəkdən bir yığma komanda! Haradan yığılıb, necə yığılı, bəlli deyil. Buna elə yığma komanda deyilməlidir. Çünki milli komanda belə olmur. Əslində, Azərbaycanda nə futbol idarəçiliyi, nə də müasir anlamda futbol var. Sadəcə imtiyazlı və futboldan uzaq bir qrup adamın işlətdiyi futbol təsərrüfatı var”.

Deputat Fazil Mustafa bu ifadələri qeyd edib. Onun fikrincə, yarı fərdi, yarı kollektiv təsərrüfatdır: ” Hərdən adama elə gəlir ki, “Qarabağ” komandası da başqa planetdən gəlib. Başqa planetdən gələnlərə toxuna bilmədiklərinə görə onu əngəlləyə bilmirlər. Təsəvvür edin ki, bir “Qarabağ” komandasının Avropa Liqasının qrup mərhələsinə çıxması Primyer-Liqdə oynayan digər komandaların hər birinə 1 milyon evro pul qazandırıb. Yəni bir komanda digər komandalar üçün oksigen balonu rolu oynayır. Yeri gəlmişkən, Santuşa nə qədər pul verirsinizsə, bilmirəm, onun onda birini bir yetim azərbaycanlı məşqçiyə versəydiniz, heç olmazsa üç ayda bir qələbə qazanardı”.