Azərbaycanda həbsdə olan erməni bir ildə 100 milyon dollar qazanıb
“Forbes” jurnalının 39-cu illik dünya milyarderləri reytinqi dərc olunub.
Yeniavaz.com xəbər verir ki, siyahıda yer alan 3 028 milyarderdən biri də 2023-cü ilin sentyabr ayında Xankəndidə keçirilən anti-terror əməliyyatı zamanı saxlanılan Ruben Vardanyandır.
“Forbes”in açıqladığı milyarderlərin siyahısında 2 623-cü sırada olan Ruben Vardanyanın ümumi sərvəti 1,2 milyard dollar təşkil edir və son bir ildə 100 milyon dollar artıb.
Qeyd edək ki, hazırda Dövlət Təhlükəsilik Xidmətinin təcridxanasında saxlanılan Ruben Vardanyana Azərbaycanın Ermənistan tərəfindən işğal olunan ərazilərində yaradılan qondarma “Dağlıq Qarabağ respublikası” və qanunsuz silahlı birləşmələri əhatə edən cinayətkar birlikdə, qanunsuz silahlı birləşmələrin və qrupların yaradılmasında və fəaliyyətinin təşkilində iştirak edərək Azərbaycan Cinayət Məcəlləsinin müxtəlif maddələrində nəzərdə tutulan əməllərin törədilməsi ilə bağlı yekun ittiham elan olunub. Cinayət işi üzrə ittiham aktı Azərbaycan Baş prokuroru tərəfindən 28 dekabr 2024-cü ildə təsdiq edilərək baxılması üçün aidiyyəti üzrə Bakı Hərbi Məhkəməsinə göndərilib.
