Vergi borcu olan şirkət Milli Məclisin 1 milyonluq tenderini udub – Maraqlı detallar
Milli Məclis tərəfindən keçirilən tender müsabiqəsinin qalibi məlum olub.
Yeniavaz.com açıqlanan rəsmi məlumatlara istinadən bildirir ki, dəyəri 965 min 690 manat 76 qəpik olan tender müsabiqəsinin qalibi “My Auto” MMC (VÖEN – 1503331321) olub.
Bildirilir ki, “My Auto” MMC avtomobillərin cari təmiri xidmətini həyata keçirəcək.
Qeyd edək ki, nizamnamə kapitalı 1000 manat olan “My Auto” MMC-nin hüquqi ünvanı Nizami rayonu, Qara Qarayev pr, ev 52, m. 37-də yerləşir. Şirkətin qanuni təmsilçisi Hüseynov Şahin Fərhad oğludur.
Tenderin qalibi olan “My Auto” MMC-nin hazırda (02.04.2025) dövlət büdcəsinə 25 623 manat 6 qəpik vergi borcu var.
Onu da bildirək ki, vergi borcu olan şirkətlərin tenderdə iştirakı “Dövlət Satınalmaları haqqında” Qanunun 23.3.5.1.-ci maddəsinin tələblərinə görə də mümkün deyil.
“My Auto” MMC fevral ayının 13-də tender müsabiqəsinin qalibi elan olunub. Əgər tender keçirilən zaman şirkətin vergi borcu olmayıbsa, o zaman 25,6 min manatlıq borc son 2 ayda yaranıb.
Məlumat üçün onu da bildirək ki, tenderin qalibi olan “My Auto” MMC-nin hüquqi ünvanı daha əvvəl Xətai rayonu, Sabit Orucov, ev 8A, m. 7-də yerləşib. Bu ünvanda “My Auto Servıce MMC” MMC (VÖEN - 2004794361) adlı şirkət də qeydiyyata alınıb. “My Auto Servıce MMC” MMC-nin qanuni təmsilçisi İlqar Muradxan Fərəci Nurəddin oğlu eyni zamanda “MF Avto Servis” MMC (VÖEN – 1306216631) adlı şirkətin qanuni təmsilçisidir. Bu şirkətin də əvvəlki adı “Kerba Avto Servıs” MMC olub. “Kerba Avto”nun rəsmi saytında qeyd olunur ki, bu marka “Türklər LTD şirkəti”nə məxsusdur. Nizamnamə kapitalı 500 manat olan “Türklər LTD şirkəti”nin (VÖEN - 2900089921) isə hüquqi ünvanı Yasamal rayonu, Hüseyn Cavid pr, ev 32, m. 33-də yerləşir. Şirkətin qanuni təmsilçisi Həməşəyev Xoca İbrahim oğludur. “Türklər LTD”nin qanuni təmsilçisi Həməşəyev Xoca eyni zamanda “KerbaAvto”da ofis meneceri vəzifəsində çalışır.
“My Auto Service” mərkəzində əsasən “Toyota” və “Lexsus” markalı avtomobillər təmir olunur. Bu təmir mərkəzinə bağlı olan “JLR My Auto Service” mərkəzlərində isə “Jaguar”, “Land Rover” və “Range Rover” markalı avtomobillər təmir edilir.
Təmir mərkəzilə eyni adı daşıyan “JLR Service” MMC (VÖEN – 1503256771) isə 25 iyul 2016-cı ildə dövlət qeydiyyatına alınıb. Hüquqi ünvanı Nərimanov rayonu, Ağa Nemətulla, ev 23, m. 84-də yerləşən MMC-nin qanuni təmsilçisi Şıxəliyev Elçin Ələskər oğludur. Bundan başqa Nərimanov rayonu, Xətai pr, ev 5, m. 62-də Qəmərli Orxan Zəlimxan oğlunun rəhbərlik etdiyi “JLR Auto” MMC (VÖEN-1505372331) adlı daha bir şirkət 19 fevral 2021-ci il tarixində dövlət qeydiyyatına alınıb. Bu şirkətlərlə bağlı diqqət çəkən məqamlardan biri də odur ki, “My Auto Service” mərkəzinin “Facabook” səhifəsində e-mail ünvanı kimi [email protected] göstərilib. Eyni zamanda əlaqə üçün qeyd olunan mobil telefon nömrəsi (055 203 11 21) həm də “Bəşir Bünyadov 40A” ünvanında yerləşən “Okean Avto Servis” mərkəzinə aiddir. Bakının məşhur təmir salonlarından olan “Okean Avto Servis”ilə bərabər “Babək Prospekt 21” ünvanında “Okean Avtosalon” adlı avtomobil satış mərkəzi də fəaliyyət göstərir. Bu mərkəzlərlə eyni adda olan “Okean Avto” MMC (VÖEN-1301673961) adlı şirkət 3 iyun 2008-ci ildə dövlət qeydiyyatına alınıb. Şirkətin hüquqi ünvanı Yasamal rayonu, Nəriman Nərimanov pr, ev 57/24, m. 33-də yerləşir. Qanuni təmsilçisi Hacıyev Əhsən Zabit oğludur.
Qeyd olunanlardan belə görünür ki, fərqli adlar altında fəaliyyət göstərmələrinə baxmayaraq ölkənin aparıcı avtomobil servisi mərkəzləri vahid mərkəzdən idarə olunur. Həmin şirkətlər indiyədək çoxsaylı tender müsabiqələrində qalib olublar.
Qeyd edək ki, adları qeyd olunan şirkətlərin bu günə – 2 aprel 2025-ci il tarixinə aşağıda qeyd olunan miqdarda dövlət büdcəsinə vergi borcları var:
“Türklər LTD şirkəti”nin (VÖEN - 2900089921) – 43 539,93 manat;
“My Auto” MMC (VÖEN – 1503331321) – 25 623,06 manat;
“JLR Auto” MMC (VÖEN-1505372331) – 2 625,28 manat.
