Şahin Xurşudov GDU-da at oynadır - Prorektorun əməllərindən müəllimlər narazıdır
Artıq 10 ildən çoxdur ki, daim tənqid olunan ali məktəblərdən biri, bəlkə də birincisi Gəncə Dövlət Universitetidir.
AzToday.az-ın media üzərindən apardığı araşdırmalardan məlum olur ki, 2014-cü ildə Yusif Yusibov GDU-ya rektor təyin olunandan sonra ali məktəbdə təhsil və tədrislə bağlı davamlı olaraq neqativ xəbərlər yayılır. GDU rektoru ən primitiv üsullarla büdcədən pul sildiyi tirajlanır. Məsələn xidməti avtomobillərin mühəriki üçün ayrılan pullar rektorun növbəti pulsilmə əməliyyatlarından biridir...
Qəribədir, universitetdə professor-müəllim heyətinin maaşı qaldırılmır, universitetə laboratoriyalara avadanlıq, kitabxanalara yeni dərs vəsaitləri alınmır, amma limon qabı, qazan, kəfkir, qaşıq, bıçaq, cömçə, tava kimi qab-qacaqlar, tualet kağızı,domestos, net kimi kimyəvi vasitələr almaq adı ilə büdcə vəsaitləri talan olunur.
Bildirilir ki, Yusif Yusibovun Təhsil naziri Emin Əmrullayevlə münasibətləri normal deyil. Demək olar ki, Yusif Yusibov nazir Emin Əmrullayev üçün arzu olunmaz şəxsdir. Təhsil Nazirliyi həm kütləvi informasiya vasitələrində dərc olunan materiallara görə, həm də nazirliyə olunan çoxsaylı şikayətlərə görə universiteti yoxlatmaq üçün xüsusi komissiya göndərib. Komissiya yoxlama prosesində maliyyə sahəsində çoxlu yeyintilər, büdcə vəsaitlərinin talanması, saxta tələbə köçürmələri və s. kimi cinayət xarakterli faktlar aşkar edib. Məsələ ilə bağlı mediada dərc olunan məlumatlara görə, bununla bağlı rektorun kabinetinə girən komissiya üzvləri rektor Yusif Yusibov tərəfindən kobud formada təhqir olunub. Rektorla komissiya üzvləri arasında danışıq alınmadıqda, Yusif Yusibov onları otaqdan qovaraq qışqırıb ki, gedin bacardığınızı eləyin. Bundan sonra rektor birbaşa Mikayıl Cabbarova zəng edib. Komissiya üzvəri bununla bağlı Təhsil naziri Emin Əmrullayevə məlumat veriblər. Emin Əmrullayev bundan sonra universitetə daha bir komissiya göndərib, özü Gəncə şəhərinə səfər edib, amma universitetə gəlməyib, digər ali məktəblərə, bir neçə orta məktəbə baş çəkib. Görünür, Maliyyə naziri Samir Şərifov, İqtisadiyyat naziri Mikayıl Cabbarov və Xarici işlər naziri Ceyhun Bayramov tərəfindən ciddi təzyiqlərə məruz qalıb. Belə ki, Yusif Yusibovun qardaşı Cavanşir Yusibov Maliyyə Nazirliyinin Aparat rəhbəridir.
GDU rəhbərliyinin daha bir gəlir yeri aylığa buraxılan tələbələrdir. Bu prosesə bir başa Tədris məsələləri üzrə prorektor Şahin Xurşudov rəhbərlik edir. 2007-ci ildən bu yana GDU-da dekan müavini, kafedra müdiri, dekan işlədiyi dövrdə adı bir çox qalmaqallı məsələlərdə, eləcə də tələbə ilə insidentdə hallanan Xurşudov hazırki vəzifəsinin icrasına başlar-başlamaz digər fakültə dekanlarından tələbələrdən pul yığmağı tələb edib. Məsələn, prorektorun kəsdiyi “racona” görə, bir tələbənin bir semestrlik aylığa buraxılmasının haqqı 500 manatdır. Buraya kollekvin və imtahanların qiymətləri daxil deyil.
Zatən Xurşudov həmişə rektorun “qara kassası” kimi tanınıb, rüşvət toplamaqda pərgar olub. İndi isə 71 yaşlı Yusifov külli-ixtiyarı verib Xurşudovun əlinə. Xurşudov isə özünü “mini-rektor” adlandıraraq sinəsinə döyür.
Şahin Xurşudov universitetdə 30 il stajı olan, maaşdan-maaşa sürünə-sürünə çıxan, işə avtobuslarda gəlib-gedən, ildə bir dəfə ayaqqabı dəyişən müəllimlərə bənzəmir. Bu adam 100 minlik avtomobildə gəzir, qolundakı saatın qiyməti 6-7 min manatdır. Şahin Xurşudov demək olar ki, Gəncədə ki, əksər ali məktəblərə əl qoyub. Məsələn o, 1, ştat vahidi ilə Gəncə Dövlət Universitetinin İqtisadiyyat kafedrasında, 0,5 ştat vahidi əvəzçiliklə və 240 saathesabı ilə Azərbaycan Texnologiya Universitetində dosent və yenə də Gəncə Dövlət Universitetinin “Təcrübə və işlə təminat”şöbəsinin “ictimai əsaslarla müdiridir...
Üstəlik Şahin Xurşudov Gəncə Dövlət Universitetinin tədrisin təşkili və təlim texnologiyaları üzrə prorektorudur.
Ən gülməli məqamlardan biri də budur ki, hər işlə məşğul olmağı bacaran Şahin Xurşudov sən demə həm də kafe işlətmək qabiliyyətinə malik imiş. Belə ki, dosent Gəncə Dövlət Universitetinin 4-cü korpusunun həyətində 20-25 kv metrlik yeri qanunsuz zəbt edərək kafe tikdirib. Hətta universitetin 5-ci korpusunda və tələbə yataqxanasındakı kafelər də ona məxsusdur.
Bildirilir ki, Yusif Yusifovun qocalığı ilə əlaqədar hüşsuzluğundan istifadə edən Şahin Xurşudov prorektor təyin olunandan sonra universiteti faktiki olaraq idarə etməyə başlayıb. Vəzifə səlahiyyətlərindən sui-istifadə edən Şahin Xurşudovun əməllərindən isə kollektivin əksər üzvləri narazıdır...
