VAR otağında qalmaqal: Mərc edərkən tutuldu – VİDEO
Futbol üzrə Bolqarıstan çempionatının ÇSKA – “Lokomotiv” matçında VAR-a cavabdeh olan şəxslə bağlı qalmaqal yaranıb.
Aut.az xəbər verir ki, görüşə bir neçə dəqiqə qalmış həmin şəxsin mərc saytını daxil olduğu məlum olub. Bu barədə dnes.bg məlumat yayıb.
Kadrlarda Volen Çinkov (matçdakı VAR hakimi), onun köməkçisi Stoyan Arsov və üçüncü şəxs – VAR-ın videoqrafı əks olunub.
Hər matç başlamazdan əvvəl VAR otağında quraşdırılmış kamera ümumi planı göstərir. Tamaşaçılar oyunun mübahisəli və əsas məqamlarını nəzərdən keçirəcək hakimlərlə tanış edilir. Lakin ÇSKA – “Lokomotiv” (Sofiya) matçının yayımı zamanı VAR komandasının üzvlərindən birinin telefonu ilə mərc saytını daxil olduğu kameraya düşüb.
Hakimlər komissiyasının sədri Stanislav Todorov bəyan edib ki, ÇSKA – “Lokomotiv” matçından (1:0) əvvəl VAR avtobusunda mərc saytı istifadə edən şəxsin Bolqarıstan Futbol İttifaqı ilə heç bir əlaqəsi yoxdur:
“Axşam saatlarından bəri bu işdən xəbərim var, Bolqarıstan Futbol İttifaqı da bu şəxslə bağlı tədbir görüb. O, araşdırılması üçün aidiyyəti orqanlara təhvil verilib. Ən əsası, demək istəyirəm ki, o, VAR-a cavabdeh olan şirkətin əməkdaşıdır. Bolqarıstan Futbol İttifaqı və hakimliklə heç bir əlaqəsi yoxdur. Federasiya şirkətə sistemin pulunu ödəyir. Biz bu şəxslə bağlı heç bir öhdəlik götürməmişik”.
