Məhkəmə Şəmşad Ağa və Şahnaz Bəylərqızı ilə bağlı qərar verdi
"Arqument.az” saytının baş redaktoru, jurnalist Şəmşad Ağa (Ağayev) həbs edilib.
Bu barədə Xətai Rayon Məhkəməsi qərar verib.
Xətai rayon Məhkəməsində hakim Rəfail Sadıxovun sədrliyi ilə keçirilən prosesdə istintaq orqanının verdiyi təqdimata baxılıb.
Təqdimat təmin olunub, Şəmşad Ağa barəsində 2 ay 1 gün müddətində həbs-qətimkan tədbiri seçilib. Ona Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb.
Vəkili Şəhla Hümbətova Turana bildirib ki, məhkəmə istintaq orqanı olan Bakı Şəhər Baş Polis İdarəsinin vəsatətini təmin edib.
"Biz istintaqın jurnalistin qaçaqmalçılığa aidiyyətini sübut edən ilkin sübutları təqdim etməsini tələb etdik. Amma məlum oldu ki, məhkəməyə ümumiyyətlə heç bir sübut təqdim olunmayıb", deyə vəkil qeyd edib.
Məhkəmə təhqiqatı zamanı jurnalist özünü təqsirli bilməyib, ittihamı böhtan adlandırıb və heç bir cinayətkar fəaliyyətdən söhbət gedə bilməyəcəyini qeyd edib.
Vəkilin sözlərinə görə, məhkəmə qərarından apellyasiya şikayəti veriləcək.
Məhkəmə jurnalist Şahnaz Bəylərqızı (Hüseynova) ilə də bağlı qərar verib. Bu gün Xətai rayon Məhkəməsində onunla bağlı istintaq orqanının təqdimatına baxılıb.
Hakim Fuad Axundovun sədrliyi ilə keçirilən prosesdə təqdimat təmin olunub. Şahnaz Bəylərqızı barəsində 3 ay 15 gün müddətində həbs-qətimkan tədbiri seçilib.
Ona qarşı Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb.
