Deputatın şirkəti yarım milyonluq tenderi uddu
Naxçıvan Muxtar Respublikası (MR) Səhiyyə Nazirliyinin Naxçıvan Sağlamlıq Mərkəzi reaktiv sərf və dərman ləvazimatlarının satın alınması ilə bağlı tenderə yekun vurub.
Qlobal.az xəbər verir ki, Naxçıvan Sağlamlıq Mərkəzinin "Reaktivlərin satınalınması" lotu üzrə keçirdiyi satınalmada "Azəri Med" şirkəti qalib elan edilib.
Tenderin məbləği 487.539 manatdır.
"Azəri Med" QSC-nin Milli Məclisin deputatı, Milli Onkologiya Mərkəzinin direktor müavini Kəmaləddin Qafarova məxsus olduğu iddia edilir.
Bu barədə yerli mediada dəfələrlə yazılmasına baxmayaraq, deputat yayılan xəbəri təkzib etməyib.
Mediada yazılan digər məlumatlara görə isə Kəmaləddin Qafarovun ailə üzvləri "Azəri Med" QSC-nin hüquqi ünvanı kimi qeyd edilən Binəqədi rayonu, Mustafa Kamal Atatürk prospekti, ev 65 A, məhəllə 3078A, mənzil 155-də qeydiyyatdadırlar.
Xatırladaq ki, cari ilin fevral ayının 2-də "Azəri Med" QSC Naxçıvan Sağlamlıq Mərkəzinin 758.093 manat smetası olan daha bir tenderində qalib edilib.
