Bakıda uşaqlar arasında yayılan rotavirus: "Ölümcül də ola bilər"
"Ümumiyyətlə, xəstəliyin qarşısını almaq üçün dərhal epidemioloji ocaqda karantin tədbirləri həyata keçirilməli və infeksiya yerində lokallaşdırılmalıdır".
Bunu Qaynarinfo-ya açıqlamasında professor Adil Qeybulla uşaq sığınacağında kütləvi yayılan rotavirus infeksiyası ilə bağlı tədbirlər planından danışarkən deyib.
Həkim bu virusa yoluxan uşaqlara ev şəraitində dehidratasiya əleyhinə dərmanların verilməsinin vacibliyini qeyd edib:
"Həm maye, həm də rehidron adlı duz məhlulu bir litr suda həll olunur və qaşıqla uşaqlara verilir ki, su itkisi onları ağır vəziyyətə gətirməsin. Bununla yanaşı, həkim müayinə və müalicəsi də davam etdirilir".
Adil Qeybulla xüsusi vurğulayıb ki, COVİD-19 başa çatsa da, epedimik ocaqlar davam edir:
"Yəni, hələlik epidemiya sönməyib. COVİD-19 pandemiyasının yaratdığı yeni vəziyyət belədir ki, immun sisteminin zəifləməsi fonunda müxtəlif virusların aktivliyi də artır. İl boyu ayrı-ayrı virusların fəallaşmasının və eləcə də epidemioloji vəziyyətin şahidi olduq. Rotaviruslar adətən yeni doğulmuş və 5 yaşından kiçik uşaqlar arasında yayılan, xüsusilə də qusma və işləmə müşahidə olunan xəstəlikdir".
Adil Qeybulla bildirib ki, 5 yaşına kimi uşaqlar bir dəfə də olsa bu virusa yoluxur:
"Bəzən yoluxmayanlar da olur. Xəstəlik həm də kantagözdür, bir-birinə yoluxma. Əgər bu uşaqlar arasında baş veribsə, onların kütləvi toplanma yeri olan bağçalarda daha diqqətli olmaq lazımdır ki, virus yayılmasın. Virusa qarşı vaksin var. Vaksin olunarsa, uşaqlar ona tutulmaz. Uşaqların vaksin olunması vacibdir. Xəstəlik qusma və ürəkbulanma ilə müşahidə olunur. Uşaqların maye durumu az olduğundan orqanizmdə maye çatışmazlığı baş verir. Bu zaman uşaqların vəziyyəti pisləşə bilir və bəzi hallarda ölümə də səbəb olar".
Xatırladaq ki, Bakıda uşaqların yerləşdiyi sığınacaqda rotavirus yayılıb.
