Tarix və Etnologiya İnstitutu 2 il ərzində texniki avadanlıqlara nə qədər vəsait xərcləyib? - ARAŞDIRMA

Abbasqulu Ağa Bakıxanov adına Tarix və Etnologiya İnstitutu 2022-ci ildən 2024-cü ilədək müxtəlif lotlat üzrə 258.582 manatlıq satınalma keçirib. 
 
Qlobal.az xəbər verir ki, bu satınalmalarda texniki avadanlıqların alınması ilə bağlıdır.
 
11 komputer, 1 diktafon...
 
İnstitut 2024-cü ilin iyul ayının 18-də "maşın və avadanlıqlar" lotu üzrə sifarişçi olduğu satınalmaya yekun vurub. Bu satınalmanın məbləği 26.671 manat, qalibi isə "Az Systems" Məhdud Məsuliyyətli Cəmiyyəti olub. 
 
İnstitutla MMC arasında bağlanmış satınalma müqaviləsinə görə qalib elan edilən təşkilat sifarişçiyə 1 ədəd noutbuk, 10 ədəd masaüstü komputer, 16 ədəd kondisioner, 1 ədəd fotoaparat, 1 ədəd diktafon, 1 ədəd yaddaş kartı almalıdır. 
  
Yenə komputer, yenə diktafon...
 
İlginc məqamlardan biri budur ki, İnstitut oxşar lotu üzrə satınalmanı 2023-cü ilin noyabr ayının 1-də də keçirib. 
 
Bu satınalmada qalib əlbəttə, yenə də İnstituta yad olmayan "Az Systems" Məhdud Məsuliyyətli Cəmiyyəti olub. 
 
Bu satınalmanın məbləği 13.326 manat edib. 
 
Bu satınalma müqaviləsinə görə isə MMC İnstituta 6 ədəd masaüstü komputer, 1 ədəd fotoaparat, 1 ədəd diktafon, 1 ədəd ledişıqlandırıcı almalıdır. 
  
Bu son deyil...
 
İnstitutut "maşın və avadanlıqların alınması" lotu üzrə daha bir satınalmanı 2023-cü ilin iyul ayının 17-də keçirib. Düzdür bu dəfə İnstitut başqa şirkəti qalib elan edib - Unisell MMC.
 
Satınalmanın smetası 16.995 manat təşkil edib. 
 
Müqaviləyə görə MMC İnstituta 14 ədəd masaüstü komputer, 130 metr şəbəkə kabeli, 2 ədəd xarici yaddaş qurğusu, 1 ədəd prezentasiya pultu, 1 ədəd yaddaş kartı alıb. 
  
İnstitutun komputerləşmə siyasəti
 
Unisell şirkəti ilə İnstitutun işbirliyi bununla bitmir. Belə ki, İnstitutla Unisell şirkətinin işbirliyi Kərim Şükürovun İnstituta rəhbərliyə başladığı zamandan qısa müddət sonra - 2022-ci ilin iyul ayının 1-də baş tutub. 
 
Bu satınalmanın məbləği 36.898 manat təşkil edib. 
 
Müqaviləyə görə 10 ədəd noutbuk, 8 ədəd masaüstü komputer, 10 ədəd müxtəlif printerlər, 1 ədəd televizor, 1 ədəd videokamera, 4 ədəd diktafon, 1 ədəd səsgücləndirici, 8 ədəd qulaqcıq, 1 ədəd rəqəmsal diktafon alınıb. 
 
Alınan malların-avadanlıqların hansı model, ölkə və buraxılış ilinə aid olması barədə açıq internet resurslarında məlumat yoxdur. 
 
Qlobal.az məsələ ilə bağlı Abbasqulu Ağa Bakıxanov adına Tarix və Etnologiya İnstitutundan mövqe öyrənib. 

İnstitutun açıqlamasında "İnstitutun kotirovka sorğuları üzrə qalib şirkətlər ilə əməkdaşlığı qanunvericiliyin tələblərinə uyğun həyata keçrilmişdir"-deyə qeyd edilir. 

Məsələ ilə bağlı Azərbaycan Respublikasının Hesablama Palatasından da mövqe öyrəndik. 
 
Hesablama Palatası 2022-2024-cü illərdə Abbasqulu Ağa Bakıxanov adına Tarix və Etnologiya İnstitutunda audit həyata keçirilmədiyini bildirdi. 
 
Qeyd edək ki, Abbasqulu Ağa Bakıxanov adına Tarix və Etnologiya İnstitutu 1935-ci ildə yaradılıb. 
 
İnstitutun direktoru professor Kərim şükürovdur.