Oliqarx məmurlar hesabına milyardlıq biznesə sahib olan Aydın Talıbov nədən qorxur?
Son vaxtlar ”Veysəloğlu” şirkətlər qrupunun rəhbəri Aydın Talıbov aktivliyi ilə diqqət çəkir. Belə ki, şirkət rəhbəri özünü yerli və xarici mediada geniş reklam etdirməyə başlayıb. AzToday.az xəbər verir ki, Talıbovun şirkətləri də hazırda piar işində xüsusi ilə seçilirlər.
Birdən-birə Aydın Talıbovun piar və reklama daha çox yer verməsi qaranlıq mətləblərdən xəbər verir. Belə ki, iş adamının keçmişi və əməlləri, ona məxsus "Araz”, "Oba” marketlərində baş verənlərlə bağlı ölkə mediasında az qala dastanlıq yazılar dərc olunurdu. İndi isə sözugedən yazılar reklamla əvəzlənib. Səbəbi isə məlum deyil. Versiyalardan biri budur ki, iş adamı keçmişini unutdurmaq üçun reklamla yuxarıların diqqətini çəkməklə cəzasız qalmağa ümid edir. Çünki, Texniki Universiteti bitirmiş, sıradan biri olan, "maaşla dolana bilmirdim, ona görə biznesə gəldim” deyən Aydın Talıbov hakimiyyətdən qovulmuş yüksək çinli məmurların sayəsində böyük bir ticarət şəbəkəsinə sahib olub. Bəli, bu şəbəkənin 145 marketi, 9 mindən artıq əməkdaşı var.
Təsəvvür edirsiniz, bu az qala böyük bir ticarət nazirliyi deməkdir. Qısa bir zamanda Veysəl müəllimin oğlu bu boyda əmlakı necə əldə edə bilərdi..? Ümumiyyətlə, dünyada ticarət biznesi, sənaye biznesi, turizm biznesi və s var. Və bu sahələrdə qazanılan pulların miqdarı, faizi elm tərəfindən ciddi öyrənilib. Və bunu sübut eləmək 2 x 2 = 4 kimi sadədir.
Bəli, konkret olaraq onu deyə bilərik ki, bu boyda biznes imperiyasının arxasında məmur, özü də elə-belə məmur yox ee…ZIRI MƏMUR dayanmasa, yüz dənə Aydın Talıbov olsa da bu boyda biznes şəbəkəsini qurmaq mümkün olan deyil. Mediada yayılan məlumatlara görə, Aydın Talıbovun biznes şəbəkəsinin əsl sahibi Naxçıvan Muxtar Respublikasının sabiq rəhbəri Vasif Talıbov olub.
Əlbəttə, bu gün təkcə İsveç bankında 1 MİLYARD dollar pulu tapılan Vasif Talıbovun oğlu üçün Aydın Talıbova "krışa”lıq etmək nə böyük problem idi… Vasif Talıbov olmasaydı, Aydın Talıbov kim idi ki, Yasamal rayonunda düz yolun ortasını zəbt eləsin, öz "Araz” marketi üçün...
Vasif Talıbov olmasaydı, sən işçiləri qanunsuz işlədə, onlara kağız üzərində bir cür, realda başqa maaş verə bilməzdin. Əmək Müfəttişliyi sənin şirkətini külli miqdarda cərimə edəndə canını qurtara bilməzdin. Vasif Talıbov olmasaydı, Aydın Talıbov Vergilər Nazirliyi yanında Bakı şəhəri Lokal Gəlirlər Departamentinin əməkdaşları tərəfindən "Veysəloğlu” Şirkətlər Qrupuna qarşı 2 milyon sanksiyadan necə qaça bilərdi..?
Vasif Talıbov olmasaydı… İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti "Veysəloğlu” MMC barədə antiinhisar qanunvericiliyini pozma əlamətləri üzrə iş qaldırmışdı.
Məlumatda deyilirdi ki, ötən il dünyada baş vermiş qlobal qiymət artımı fonunda ölkəmizdə bir sıra ərzaq məhsullarının qiymətində dəyişiklik müşahidə edilir. Qiymət manipulyasiyalarının qarşısının alınması üçün Dövlət Xidməti bazarda antiinhisar qanunvericiliyinin tələblərinə əməl olunmasına nəzarət məqsədilə araşdırmalara başlayıb, yerli idxalçı müəssisələrə zəruri sənəd və məlumatların təqdim olunmasına dair sorğular göndərib.
Sorğulara əksər təsərrüfat subyektləri tərəfindən vaxtında cavab verilməsinə baxmayaraq, "Veysəloğlu” heç bir sənəd və məlumat təqdim etməyib. Bununla bağlı şirkət barədə antiinhisar qanunvericiliyinin pozulması əlamətləri üzrə iş qaldırılıb. İşə baxılması nəticəsindən asılı olaraq, təsərrüfat subyekti barədə qanunauyğun tədbir görüləcək. Nə oldu, nə baş verdi..?
Əlbəttə, Vasif Talıbovun tapşırığından sonra hər şey öz yoluna düşdü. Bu tip sualların sayını kifayət qədər artıra bilərik. Bəli, dəfələrlə yazılıb ki, xaricdən dəvət etdiyin əcnəbi revizorlara 20-30 min manat maaş verirsən, bizim millətin nümayəndələrinə 300-400 manat… Biz sənə yazanda ki, marketlərində satılan ərzaqlar insanları zəhərləyir, onların sağlamlığına ziyan vurur…
Onlarla supermarketlər, minimarketlər, böyük satış anbarları, bir sözlə, Veysəloğlunun biznes imperatoprluğu. “Araz”, “Oba”, “SPAR” marketlər şəbəkəsi, “Ulduz” şokolad fabriki, Naxçıvanda “Sirab” mineral sular zavodu, “Favorit”, “Xonça”, “AVT Logistics”, cürbəcür KAFE-lər, hətta KİA avtomobillərinin satışı və daha nələr… Üstəlik Gürcüstanda “VG” (Veyseloglu Georgia) distribüsiya şirkətləri, Türkiyədə şirkətləri…. Bu boyda biznes imperiyasının sahibinin Şərurlu bir kənd müəlliminin, “prorab” oğlu Aydın Talıbov olduğu inandırıcı görünmür.
Bu boyda biznes şəbəkəsinin arxasında PA-nın sabiq rəhbəri Ramiz Mehdiyev, Naxçıvanın sabiq şefi Vasif Talıbov, sabiq baş prokuror, hazırda həbsxanada olan Eldar Həsənov və digərləri dayanması haqda ciddi iddialar var. Vasif Talıbovun icazəsi olmadan Aydın Talıbov Naxçıvanda nəinki SİRAB mineral sular zavodu, heç su köşkü də aça bilməzdi. Veysəloğlu Şirkətlər Qrupuna məxsus marketlərdə kiflənmiş pendir, qurdlu şokolad, içindən bolt-qayka çıxan tumlar satılmasından, yaxud “Araz” marketlərində köhnələn, vaxtı keçən qida məhsullarının OBA-da kasıb camaata satılmasından, vitrindəki qiymətlərlə kassadakı qiymətlər arasındakı xeyli fərqdən, Əmək Müfəttişliyinin, Qida Agentliyinin ortaya qoyduğu faktlardan və s bəhs etməyə ehtiyac görmürük. Heç Ramiz Mehdiyevin, Vasif Talıbovun əli ilə “Ulduz” şokolad fabrikini Aydın Talıbovun necə ələ keçirməsinə də toxunmuruq. Çünki daha ciddi məqam Veysəloğlu Şirkətlər Qrupunun Ramiz Mehdiyevin, Vasif Talıbovun şərikli biznes şəbəkəsi olmasıdır. Ramiz Mehdiyevin, Vasif Talıbovun aqibəti bəllidirsə, Veysəloğlunun gələcək talehi də bəllidir...
Orxan Məmmədli
AzToday.az
