Xırdalanda qanunsuz tikinti aparan Alişan kimdir? - VİDEO
Abşeron rayon Xırdalan şəhər AAAF yaşayış kompleksinin arxasında heç bir rəsmi icazəsi olmadan tikinti həyata keçirilir.
Son günlər Abşeron rayonunda qanunsuz tikililərin sayı getdikcə artır. Rayon icra hakimiyyəti ilə anlaşan iş adamları və maklerlər qanunları heçə sayaraq "öz işlərini” rahat şəkildə həyata keçirirlər.
AzFakt.com-a daxil olan məlumata görə belə qanunsuz tikililərdən biri də Abşeron rayon Xırdalan şəhər AAAF yaşayış kompleksinin arxasında həyata keçirilir. Belə ki, ərazini alan Alişan adlı şəxs ordakı evləri sökərək yerində tikintiyə başlayıb. Bildirilir ki, aparılan tikinti Şəhərsalma və Tikinti Məcəlləsinin məskunlaşma sistemi, zonalaşdırma və ərazi zonaları barədə olan müddəalarını kobud surətdə pozur. Tikinti Məcəlləsinin 13-cü maddəsinə görə planlaşdırılan tikintinin mərhələləri və məzmunu barədə aidiyyatı qurumların rəsmi icazəsi olmaldır. Ancaq Xırdalan şəhər AAAF yaşayış kompleksinin arxasında aparılan tikinti barədə Dövlət Şəhərsalma və Arxitektura Komitəsinin bazasında hər hansı bir məlumat yoxdur. Bu isə o anlama gəlir ki, tikinti üçün aidiyyatı qurumların rəsmi icazəsi yoxdur.
Məlumata görə AAAF yaşayış kompleksinin arxasında aparılan tikintinin sahibi Alişan adlı şəxs Abşeron rayon İcra Hakimiyyəti ilə "anlaşıb". Bu belə olmasaydı Abşeron icra hakimiyyəti və aidiyyatı qurumlar olan Dövlət Şəhərsalma və Arxektura Komitəsi və FHN-nin Tikintidə Təhlükəsizliyə Nəzarət Dövlət Agentliyi tikintiyə müdaxilə edərdi.
Məsələ ilə bağlı araşdırmamız davam edir.
Yazıda adı keçən qurumların mövqeyini dərc etməyə hazırıq.
