“Sabah”ın planı bəlli oldu: Milyonlar “yuyulacaq”
Azərbaycan Premyer Liqasının 19-cu turu çərçivəsində keçirilən “Neftçi” – “Sabah” matçından sonra (1:1) baş tutan mətbuat konfransında qonaq komandanın baş məşqçisi Vasili Berezutskinin verdiyi açıqlama diqqəti cəlb etdi. Rusiyalı mütəxəssi ona transferlərlə bağlı ünvanlanan suala belə cavab verdi:
“Həm qış, həm də yayda skautlarımız işləyəcəklər. Çox istəyirik ki, bütün mövqelərə oyunçu transfer edək. Bununla rəqabəti artıraq”.
“Sabah”ın baş məşqçisinin bu sözlərinin altında nə yatdığını anlamaq elə də çətin deyil. Çünki yeni mövsüm üçün legioner limitini müzakirəyə çıxaran şəxs paytaxt klubunun prezidenti Maqsud Adıgözəlovdur. O, limitin ləğv edilməsi üçün son zamanlarda hər şey edir. Vasili Berezutskinin söylədiyi sözlər əslində onun deyil, klubun mövqeyidir. Çünki Azərbaycanda baş məşqçilər belə açıq şəkildə transferlərdən danışmazlar. Bununla da rusiyalı mütəxəssis ictimaiyyətə ona legioner futbolçu lazım olduğunu bildirir.
Amma reallıqda bu, “Sabah” rəhbərinin planıdır. Bununla o, klub təsisçisi Mikayıl Cabbarovun inamından istifadə edərək, milyonlarla vəsaiti “yumaq istəyir”. Çünki legioner gətirmək əslində böyük vəsaitin arxasına keçmək üçün ən ideal vasitədir. Menecerlər, futbolçular, məşqçilər, funksionerlər məhz legioner transferləri sayəsində büdcələrini zənginləşdirə bilirlər. Maqsud Adıgözəlov da məhz bu məqamdan yararlanmaq istəyir. Limitin ləğv edilməsi isə ona daha yüksək məbləğlər xərcləmək üçün yeni imkan yaradacaq.
Ona görə də futbol ictimaiyyətini Berezutski vasitəsi ilə buna hazırlayır. Böyük ehtimalla, elə Rusiyadan xeyli vecsiz futbolçular “Sabah”a gətiriləcək. Onlarla yüksək maaş müqabilində müqavilə bağlanacaq. 6 ay və ya bir ildən sonra isə geri göndəriləcəklər, əvəzinə isə başqaları gələcək. Nəticə olmayacaq, pul “yuyulacaq”, Azərbaycan futbolu və o cümlədən “Sabah” heç nə qazanmayacaq. Amma qazanan və ya qazananlar mütləq olacaq. Korrupsiya oradadır. Ora diqqət!
Aut.az
