“Rusiya Fransa və Avropa üçün təhlükəyə çevrilib” – Makron xalqa müraciət etdi
Fransa Prezidenti Emmanuel Makron xalqa müraciət edib.
Yeniavaz.com xəbər verir ki, Makron xalqa müraciətini fransızların haqlı olaraq narahat olduğu beynəlxalq vəziyyətlə izah edib.
O qeyd edib ki, Birləşmiş Ştatlar Ukraynadakı müharibə ilə bağlı mövqeyini dəyişib və Avropa İttifaqından gələn mallara gömrük rüsumları tətbiq etməyi planlaşdırır:
“Biz yeni dövrə qədəm qoyuruq. Rusiya Şimali Koreya əsgərləri və İranın hərbi texnikasından istifadə etməklə Ukraynadakı müharibəni qlobal münaqişəyə çevirib. Rusiya hərbi potensialını artırır. Avropa ABŞ-nin bizim tərəfimizdə olmayacağına hazır olmalıdır. Rusiyanın Ukraynada dayanacağına kim inanacaq? Rusiya Fransa və Avropa üçün təhlükəyə çevrilib. Sizə təsvir etdiyim vəziyyət tam olaraq belədir və biz bununla məşğul olmalıyıq. Sülhə gedən yol isə Ukraynasız ola bilməz. Ukraynanın kapitulyasiyası ilə sülh əldə edilə bilməz. Unutmaq olmaz ki, Rusiya 2014-cü ildə Ukraynaya təcavüzə başlayıb. Biz Minskdə atəşkəs haqqında razılığa gəlmişdik”, - Makron bildirib.
Makron avropalı müttəfiqlərlə işləməyin Fransanın maraqlarına uyğun olduğunu deyib. Gələn həftə o, davamlı sülhün yaradılmasına kömək etmək istəyən dövlət başçılarını bir araya gətirəcək. Prezident qeyd edib ki, Fransa bu planı Ukrayna və digər Avropa tərəfdaşları ilə birlikdə hazırlayıb:
“Ukraynada sülhün tezliklə əldə olunmasından asılı olmayaraq, Avropa dövlətləri özlərini daha yaxşı müdafiə edə bilməlidirlər. Müdafiəmizi gücləndirməliyik. Bu baxımdan biz NATO-ya sadiq qalırıq, lakin müstəqilliyimizi gücləndirməliyik. Avropanın gələcəyi Vaşinqton və Moskvada həll edilməməlidir”.
