İran ordusu gücləndirilmiş döyüş hazırlığı vəziyyətinə gətirilib
ABŞ prezidenti Donald Trampın İranı bombalamaqla hədələməsindən sonra İranın ali dini lideri Əli Xamenei ölkənin silahlı qüvvələrini gücləndirilmiş döyüş hazırlığı vəziyyətinə gətirib.
Bu barədə “Reuters” agentliyi yüksək rütbəli İran rəsmisinə istinadən məlumat yayıb.
Mənbənin sözlərinə görə, İran İraq, Küveyt, Birləşmiş Ərəb Əmirlikləri, Qətər, Türkiyə və Bəhreynə müvafiq mesajlar göndərilib. Qeyd olunub ki, ABŞ-nin İrana hücumuna hər hansı dəstək, o cümlədən hava məkanının və ya ərazisinin bu məqsədlə Vaşinqtonun istifadəsinə verilməsi “düşmənçilik hərəkəti” kimi qiymətləndiriləcək.
Qeyd olunub ki, İranın mesajında belə bir hərəkətin ciddi nəticələrə səbəb olacağı da bildirilib.
Mənbə bildirib ki, İran Trampın birbaşa danışıqlar tələbini rədd edib, lakin Omanın vasitəçiliyi ilə dolayı danışıqları davam etdirməyə hazırdır.
Qeyd edək ki, mart ayının sonunda Tramp bildirib ki, Vaşinqton və Tehran İranın nüvə proqramı ilə bağlı razılığa gələ bilməsələr, ABŞ İranı vuracaq.
“Biz başqa bir ölkənin nüvə silahı əldə etməsinə icazə verə bilmərik. Mən danışıqlara ümid edirəm. Əks halda, hərbi gücə əl atmalı olacağıq və bu, dəhşətli olacaq”, - Tramp bildirib.
