Ermənistan prezidenti Aİ-yə üzvlük prosesinin başlanması ilə bağlı qanunu imzaladı
Ermənistan Prezidenti Vaaqn Xaçaturyan ölkənin Avropa İttifaqına (Aİ) qəbulu prosesinin başlanması haqqında qanunu imzalayıb.
Yeniavaz.com xəbər verir ki, bu barədə prezidentin mətbuat xidməti məlumat yayıb.
Qanun Ermənistanın “mütərəqqi, sivil və inkişaf etmiş bəşəriyyət ailəsi”nə qoşulmaq niyyətini bəyan edir və mövcud hakimiyyətin bu kursu davam etdirmək üçün siyasi iradəsini və qətiyyətini gücləndirir.
Sənəddə qeyd edildiyinə görə, Aİ-yə üzvlük milli təhlükəsizliyin təmin edilməsinə, ordunun Aİ-yə üzv dövlətlərin standartlarına uyğun modernləşdirilməsinə, insan hüquqlarının möhkəmləndirilməsinə, yeni iqtisadi mexanizmlərin yaradılmasına, eləcə də həyat səviyyəsinin yüksəldilməsinə və demoqrafik problemlərin həllinə töhfə verəcək.
Martın 26-da Ermənistan parlamenti respublikanın Aİ-yə daxil olması prosesinin başlanması ilə bağlı qanun layihəsini ikinci və yekun oxunuşda qəbul edib.
Layihə bu məqsədlə ölkə vətəndaşlarının 60 min imzasını toplayan bir sıra ictimai-siyasi təşkilatların təşəbbüsü çərçivəsində irəli sürülüb (Ermənistan Konstitusiyasına görə, mülki qanun layihələrinin parlamentdə baxılması üçün ən azı 50 min imza toplanmalıdır).
Bundan sonra Ermənistan Aİ-yə namizəd statusu qazanmaq üçün bir çox islahatlar həyata keçirməli və öz qanunvericiliyini Aİ-nin qanunvericiliyinə uyğunlaşdırmalıdır.
